تساؤلات000

ها قد مرت الأيام

ها قد مرت الأسابيع

لماذا لا أستطيع أن أنساك ؟

لماذا أقف عاجزة أمام ذكراك؟

لماذا أشعر بالضياع بلاك؟

لماذا أبلل وسادتي دموعا كل ليلة؟

لماذا أضع يدي على صدري محاولة إقتلاع قلبي؟

لماذا أراك في كل مكان؟

لماذا أشعر بأني دون مأوى؟

لماذا أشعر وكأن روحي تتمزق؟

لماذا أشعر بأن جسدي يتكسر؟

لماذا أصرخ بداخلي وأتألم؟

لما لا تنطق شفتاي إلا بكلمة واحده؟

أحتاجك .. ..

لما أنا ضعيفة أمامك؟

هل تملكني حبك لهذه الدرجة؟

هل تغلغل حبك في كل خلايا جسدي؟

هل إرتسم حبك على خارطة روحي؟

هل سكن حبك في عظامي؟

أم هل تراني أدمنت حبك؟

إن كنت  قد أدمنت حبك

فأسألك بكل ماهو معظم لديك

أن تعود إليّ

كي تعطيني جرعة أخيرة من حبك

وزد في جرعتي علني

أموت من حبك

خير لي من أن أموت من فراقك….

بواسطة :

وفاء

وآآآآآآآه …ياسفانة

سُـــفـــَانـــَة

لطالما شكل لي اسمي مشكلة سواء في نطقه أو في إثارة استغراب الجميع وسؤالهم المتكرر لي عن معناه

والمواقف اللي سارت لي عليه لاتعد ولا تحصى

 أول شي سرت أسويه بعد ماعرفت السيستم وحفظته للي يبغى يسأل عن اسمي وهي على التوالي بالترتيب الأوتوماتيكي

1-طبعا أسدّح معنى اسمي اللي هوا  نوع نادر من اللؤلؤ >>>ركزوا على النادر ياجماعة تراه لب الموضوع

2-أقلهم ياجماعة ترا سَفّانَة بنت حاتم الطائي (الغني عن التعريف)
اللي كان ليها الموقف الشهير مع الرسول عليه الصلاة والسلام ..واللي أسلمت بعده

سنة أولى ثنوي اعتقد ..اخدناه في كتاب المطالعة
بعدها البنات كأنهم مكتشفين شي من المريخ
يقولوا أخيييييرا عرفنا معنى اسمك ومن فين جايبينه
>>ووجهي يسير علامة استفهام كبيرة

3- أبين لهم طريقة نطقه انها بضم السين وفتح الفاء بينما اسم الصحابية بفتح السين والشدة على الفاء

4- إذا كانت المسألة فيها شغل رسمي زي الجامعة أو المستوصف أوي أي مكان بنفس النمط دا أبدأ أهجّي السبيلنغ للشخص سين فاء ألف نون …واللقب أكييد يلحق الاسم في التهجية وبقوووووة كاف ..راء…>>>ههه بحط جائزة همر للي يعرفه

 

الممرضات والدكاترة  في أي مستوصف أو مستشفى كل وحدة تنادي اسمي على حسب جنسيتها
مرة أسير  صوفاناه-سوفاناه-صافانا ..والسؤال اللي بعده على طول إنتي سعوديية؟؟
 
(حشائش السافانا) لما أخدناها في الجغرافيا اتبهدلت عليها

مرة في المطار سارت مشكلة مع اللي يوقفوا عند الباب لأنو شايف الاسم في التذكرة (سلطانة) وفي بطاقة العائلة (سفانة)ومعصي الرجال يتزحزح عن رأيه  يقلي في أحد في الدنيا اسمه سفانة؟؟؟>>>أجل سلطانة هاااا

 دكاترة الجامعة دااايما أنا في مشكلة معاهم
بالذات مع اللقب شييييي
مايصدقوا يخلصوا من مطب الاسم يطيحوا في مطب اللقب الأدهى والأمر
مرة واحد من الدكاترة يقلي your name sounds frensh

دا السيمستر جاينا واحد دكتور ينطق اسمي صح
بس اللقب دايييخ فيه
كل مرة يطلع بلقب جديد 
والبنات اللي معايا ابو التعليق>>كنا كل مرة نسكت لما يجي الدور على اسمي عشان نشوف الدكتور اش يهبب في نطقه دي المرة

دكتورنا وبعد معارك عديدة وتنبيهات متكررة مني ومن البنات سار يقول سفانة محمد >>ريح دماغو

أنا عاجبني اسمي موووووت وعموما أسماء أخواني وأخواتي كلها قايمة بمفعولها وكلها غريبة >>>يسلم زوق الماما والبابا >>عاملة كوول

دايما مافي غيري في المراحل الدراسية ..ولا في مني غير واحد في الجامعة ..غنية عن التعريف في جميع الأحوال >>الراس سار كبر البردقانة   

اه ياسفانة>>>ادعس اللنك للسماع

أغنية جديدة لمطرب عراقي ماصدقت على الله لقيتها حسستني بدخولي لعالم الشهرة والعياذ بالله

>>>وجاري البحث عن رقصة سفانية محترمة

كل يوم ح أقرا دعاء التعوذ من الرياء عشين عملي يكون خالص لوجهه الكريم

>>>>وقبل لاأنسى حقوق نسخ الاسم ولصقه محفوظة عندي اللي يبغا يسمّي لازم يستأذن مني تحت طائلة المسؤولية في الدنيا والمحاسبة في الآخرة

وآآآآآآآآآآآآآآآآآآآآآآه ياسففااااانة…ترا بحبها ابتليييييييييييييييييييت

العين بصيرة …واليد قصيرة

وكمثل عادة الجلسات التفقدية الهادفة اللي تحدث خلال اليوم الجامعي
جالسين الشلة الكريمة نتباحث قضايا الشرق الاوسط

إلا قامت وحدة من الأخوات الصالحات (نحسبها كذلك والله حسيبها)(مو بحرف النون) تفتي وتتحدث بما في جعبتها ..وتحكي عن حالها هيا واخواتها
>>> (هما 4 بنات بس تبارك الرحمن..أكبرهم متخرجة من الجامعة من مدة واصغرهم في الثانوي)

>>>>الحوار من تأليفي مو زي ماسار حرفيا

-سفانة ..شفتي اخر هبقاتنا انا واخواتي وبالذات اختي الكبيرة
-وش وش جب جب
-نبغا نتبنّى أنا وأخواتي لأنو كمان اختي الكبيرة بالذات عندها احساس امومة متفجر
-هههههه مرة خليها ترتاح ترا
-والله من جدها

-والله حماس .. طيب اسألوا وشوفوا اش المطلوب عشين التبني دا؟ا

بعد فترة ليست طويلة من حوارنا السابق

-هااا اش اخبار اختك اتبنت
-لا ياشيخة تعقيد ..خلاص اتسلطنا على ولد الجيران امه تنبسط لما ناخده وسرنا نمشيه ونهتم بيه ونوديه السوق نلعبه واخر فلة

مرت عليا (ومن غير مبالغة) الكثيييير من حالات البنات اللي يبغوا يتبنوا ..بغض النظر عن دوافعهم

أعطيكم حالة أخرى مستعصية ..

>>وحدة من صاحباتي (مو اسمها وفاء)
رجتتتتتتتتتتنا بحكاية التبني دي ..وبتفكر في الموضوع بجدية
وسألت عن الشروط المعقدة اللي حاطتها دور الرعاية وكان منها

1-أنو البنت لازم تكون متزوجة

2-انها تكون موظفة

3-………

4_ …….. >>>ماعليكم في الكلام الكتير

المهم مو (وفاء ) هادي دحين في مرحلة تفكير اقناع ذوي الامر ..

أو كما يقال في انتظار تخرجها لتتوظف وتعين خير عشان تتبنى >>>فهل ستحقق الحلم ؟؟

ويأتي المنتظر الذي سيلعب في بطنها..والذي ستبذل الغالي والرخيص من أجل أن يقول كلمة (ماما) >>هع حبكتها مررة
……………… ….

الأمومة ..الهدف الوحيد لكثير من الفتيات قبل الزواج..وبعده ..
(أبغا أسير أم)
هو جواب كثير من الصغيرات لسؤالنا المعهود لها عن طموحها المستقبلي

فكرت كثيرا في موضوع التبني ..سواء سلبياته أو ايجابياته

# ليش دور الأيتام بيحددوا دا الشي ويخلوه للمتزوجين الغير قادرين على الانجاب فقط

# ليش مايفتحوا الموضع شويا ويدخلوا فيه البنات اللي نفسهم يسير عندهم أطفال (طبعا اذا كانت البنت مؤهلة نفسيا ومستقلة ماديا)

#العاطفة اللي عند البنات وغريزة الأمومة الفطرية لو اتوزعت بشكل متعادل كان كتير من الأيتام عايشين في سعادة لاتوصف..

# في وجهة نظري أن الفتاة بتلك الطريقة ستتحمل المسؤولية بشكل كبير لأنها ح تحس انو في يدها حياة طفل …

# وح تفرغ كثير من عواطفها في الاهتمام بهذا الطفل وكأنه جزء منها وبالتالي حتقل كثير من مشاكل التخبط العاطفي اللي عايشينه البنات…

# لمتى البنات يستنوا فارس الأحلام اللي صار من الصعب إيجاد مواصفاته في زمنا هذا ؟

# هل لو ماشرف حضرة جناب العريس المنتظر فمعناتو نهاية حلم الأمومة بكل بساطة؟

هاااااااااااااااااااااا ياجماعة..يجي نسوي مظاهرة ونفتح شركة الطفولة المتحدة نص كم دوت كم >>>برررا

آراءكم لاهنتوا..

سفانة

جَامِعَتنا….جَامْعَتْنا..

*

*

* 

أخدت هذه الصور خلال جولة تفقدية تفحصية شاملة ..على جامعة أم القرى ..امتدت التغطية لمدة أسبوع كامل ..وتعين فيه على سفانة ووفاء المخاطرة بأرواحهن في سبيل خدمة الشعب ..وإظهار الحقائق ….والمصداقية شعارنا >>أمحق من شعار

*

*

*

*

*

 

*

*

*

>>طلعوا  الفروقات الاربعطعشرمية بين القاعات السابقة ..

*

*

*

*

*

المعركة بين غندور وأبو بلونة …أيهما يفوز؟؟

*

*

*

مكب النفايات المتنقل ..بالله أسعفونا بأقرب بلدية

*

وياما تحت الكراسي ..دواهي

*

*

تفخيم الراء..ترقيق الراء ..ونحن منهم برآء

*

*

سلك أضناه اليتم..فحاول أن يجد ضالته ..ويشق طريقه بعناق حنجرة وفاء ..

وفي رواية أنه سلك مخصص لشحن البنات لاستكمال طاقتهم ونشاطهم عن طريق الجبهة

 *

كهههرب ..كهرررب .. جنبو لاتلللعب

*

*

*

*

المجرم الصغير (الكسر في الدرج) الذي عرقل سفانة في طريقها لطلب العلم

بواسطة s and w

ينبع..مكة..وحضارتين

بحكم معيشتي في ينبع الصناعية(الهيئة الملكية) لفترة طويلة (منذ ولادتي حتى الثانوية)وحتى انتقالي الى مكة للدراسة زي ماتقولوا (ملتيبل سيستم)

تكونت لدي مجموعة من الانطباعات حول ينبع ومكة وطبعا كلها شخصية.. والناس  في مذاهبهم يختلفون..

ينبع الصناعية ..مدينة هادئة جدا ..يغلب عليها الروتين اليومي ..والرطوبة الشديدة ..رائحة دخان المصانع الممزوجة برائحة ملح البحر..كثير من ذكرياتي القديمة محفورة في تلك الاماكن المتناثرة..النظام فيها رائع..الشوارع نظيفة وملمعة دائما..من غير ضجيج ولا إزعاج ..البيوت والأحياء مرقمة وليها أسماء يعني ماتحتار في الوصف!!!

في رأيي هي المدينة المثالية لمن هم في حاجة إلى التركيز على العمل..أو إلى عشاق الرومنسية والروقان .. والنوم الباكر  (ترا الحد الأقصى للسهر لو مررة كترت الساعة 1 ومع الواسطة)
كثير من اللي كانو مايحبوها وعاشوا فيها انقلبت بيهم الحال إلى حبها ..أكثر ماأحبه في ينبع بحرها وطبعا البحر كلام تاااني في ينبع ..قمة الروعة والنظافة والهدوء الله يخلف على بحر جدة.. واللي خبرة في الأماكن المميزة ح يعرف أكتر وأكتر
وأكيد أحب فيها ذكرياتي اللامتناهية هناك..

وأكثر مايضايقني فيها شحوبها لدرجة الموت ..بالذات أيام الإجازت حيث يجد (الحرامية) مرتعا خصبا للسرقات المحترفة..
كما يضايقني مستوى المعيشة العالي الذي يظهر بشكل واضح  في المدارس أو الاحتكاك بالمجتمع ككل حيث تكثر فيه (الفشخرة) وطبقات ال(ياي) كما هو معروف (وكمثال بسيط على ذلك طوابير السواقين المتراصة أمام بوابات المدارس التي بلاشك تضم أكشخ واخر مودييلات السيارات والسواقين اللي يشيلوا الشنط للبنات (قاعدة بقلبي)-احاديث البنات تتمركز  غالبا  حول رحنا وجينا من واشترينا واتك اتك..وبلاشك في مجتمع ينبع الصغير تجد الأخبار والفضايح تنتشر كانتشار النار في الهشيم (يعني الخبر ينتشر قبل لايسير الحدث >>هع  بالمناسبة أعتبر ينبع ليها مستقبل باهر جدا جدا لانو دحين بتعيش فترة انتقالية تطورية فظيعة ..وحتتوسع وتسير يمكن أشهر من جدة فااعطوها كم سنة قدام وح تشوفوا الفرق مكة المكرمة ..بعيدا عن كونها قبلة المسلمين في العالم أجمع وقدسيتها فانطباعي الشخصي عنها كالتالي..

 الجو الغالب على مكة  هو الطقس الحار لدرجة الاختناق ..شمسها عمودية تصقع في الراس..
غالبية سكانها يتميزون بالعصبية الشديدة والدم الحااااار بطريقة مخيفة (والله ماينلاموا من صقعة الشمس في رووسهم)
وطبعا الغالبية برضو يتميزون بالفوضى الشديدة اللي تصل أحيانا للهمجية (و(السقط) على بعض و الوقوف عند الاشارات وسماع البواري مع المصطلحات الجميلة ذات الطابع الرنان خير دليل على ذلك)   ..

تعتبر مكة المكرمة مدينة نابضة بالحركة والأكشن لأبعد حد مع انو أماكن التمشيات والأسواق  اللي فيها مفقعة كلها ..بس الله يخلي جدة بنقزة وانتوا فيها
وعلى الرغم من كل عيوب مكة فقد استهواني العيش فيها لدرجة كبيرة  وبالذات في بساطة أهلها وعدم تكلفهم..

لكن معاناتي في بداية انتقالنا كانت كبيرة..

كنت مااصدق انو في سيارات بدا الشكل ممكن تمشي ويدب فيها الحياة (كوروسيدا بيضا موديل 92 صوت مكينتها سابقها من بداية الشارع- من غير مكيف هادا شي طبيعي في السيارات ولو بمكيف يغلى راتب السواق- ميكروباص من غير أبواب )..ترا أي شي ليه 4 كفرات حتى لو ماكان صالح للاستخدام في مكة يمشي الحال ..

عانيت ايضا من بعد المصطلحات المكاوية الصعيييبة والحوارتية نوعا ما ..والتي بدأت أكتسب الكثير منها في الفترة الحالية

إلى الآن  استغرب من الخشاخيش والحواري اللتي تتوارى خلف المباني ..مكونة كتل من العصابات ذات الجنسيات المتعددة الغير مقدور على حصرها

هذا الى التنوع العجيب والغريب في أسماء مناطق مكة  صعودا من (جبل الشراشف ) إلى حارة (الطنضباوي)-(حوض البقر)  وهلم جرا  ..
وبالرغم من كل دا والله أحب مكة

ماذا عنكم..أي المدن يستهويكم العيش فيها..وأيهم تنتقدونها..وأي المدن تكنون لها مشاعر الحنين ؟؟

أترك الحديث لكم..ودمتم

بواسطة (S)..سفانة

سوا يا سوا

بسم الله الرحمن الرحيم

اليوم موضوعي موجه لفئة معينة من الناس و يمكن مايهم شريحة كبيرة من الناس  بس برضو بما أني مريت بتجربة  قهرتني فحبيت  إني أشارككم هي

  الشريحة اللي اقصدها  هما اللي زي حالتي ..ناس يحبوا الهدوء ومايحبوا القروشة (الازعاج) في الفواتير ورجتها فيضطروا يلجأوا للوسائل التانية االي منها استخدام بطاقات الشحن سواءً (سوا) أو (موبايلي

اللي حصل  معايا ياجماعة وقهرني ونكد عليا ااني كنت رايحة الجامعة ومستعجلة عندي محاضرة وطبعا مااقصر  مخلصة الرصيد أول بأول  ..المهم وقفنا عند أقرب بقالة(ترا حتى في المكتبات ومحطات البنزين ومحلات العطور والملابس وحتى راعي الكفتيريا اللي جنبنا يبيع بطايق شحن)المهم بلا طول سيره

 والسواق المسكين ينزل ويشتري بطاقة ..وافتحها الاقي الرقم السري ممسوح من صباح رب العالمين ..استمريت على دا الحال 3 مرات

وسواقنا رايح جاي ع البقالة ؟؟دا كلو طبعا وأنا ملطوعة في السيارة

السؤال هنا ..فين الخلل في بطاقات سوا .!!؟؟.

وهذا الموقف خلاني افكر في موضوع شرايح سوا ومشاكلها ولاحظت انه في بعض الاماكن يبيعو البطاقه بزياده عن سعرها الاصلي مثلا صاحب اخويا في الجامعه راح يشتري بطاقه وفوجيء انهم يبيعو البطاقه اللي بعشره ب11 ريال وهكذا دواليك وطبعا المضطر يركب الصعب

وهذاغير انه الشرايح صارت تتباع كمان في أي مكان زي بطايق الشحن و ماشاء الله عاد طالبات المدارس يوزعوها بين بعضهم وكل هذا من ورا اهاليهم

انا مااعرف ليش الشركه ماتعمل رقابه على موضوع الاسعار والشرايح ؟؟

وفي الاخير احب اقول انه هذي وجهة نظري واتمنى اني مااكون ازعجت أي احد بس زي ماتعرفو (لازم اعبر ولازم اقول )

ولا تنسو انها البدايه وبس ……

 (w)

وفاء

وبدأت زحلطة الهشك بشك

نبغى نعبر.. نبغى نقول

 

 

راح نكون دايما ..كووول

 

 

راح ننعنشها.. وراح نهششها

 

 

راح نبشكها بالعرض.. وبالطووول

 

محاضرة sociolinguistics

1_3_1429

s and w